黑仔事件

最近頭頭碰着黑，以為踏入龍年會黑氣盡除，點之.....

黑仔1)

過年前幾天，難得老細放人可以早走，就去維園行吓年宵，點之都未行一圈，隻鞋就鞋底脫落，初時還連住一半，行無幾步整個鞋底和表面分離，只好慢慢行去公園坐一陣，我應該點做呢一陣還要去食自助餐，點行去？好彩當天沒有落雨，著住只剩一塊底的連面的部份，慢慢行去天后，只有一間運動用品店，入到去只想買對平平的波鞋，點之我選的款沒有我碼，選了好幾款都沒有，店員話不如買新出的款有你碼呀，嘩﹗要差不多九百元，我已經有幾對運動鞋，不想再浪費，但吾買過對鞋點行出街呀，只好選了一對最平的布鞋，但個碼差少少，算吧應該無問題，由天后行去富豪酒店不是太遠，但對鞋夾腳好痛呀﹗去到酒店都已無心機食﹗

黑仔2)
公司提早放假，以為多了假去影相，點之前一天有少少腰痛，還不以為意，點解又越來越痛，唉﹗又要見我的家庭醫生，每次臨過年都要見吓佢，又是老無病坐骨神經痛，睇了一次醫生應該無咁痛掛，點之食晒藥還有痛，還是睇多次，這兩天左腳腳指公又突然紅腫，睇生睇左話只是少少紅腫沒問題，塗點藥膏就沒事，腰痛換了藥應沒痛，好啦我信架﹗

黑仔3)
過年前有親人跌親左手入了醫院，大年初一我就要去醫院探病，醫生話病人在醫院都沒有甚麼可以治療，又是食止痛孳，不如病人回家，好啦,探病改為接出院，新年流流出入醫院已經不是太好，更黑仔事件是坐的士送親人回家途中，想起沒有鎖匙，屋企人去左旅行，只好再折返醫院致電其她親人，才有鎖匙入屋，好黑呀﹗

食了藥腰無咁痛，腳指又好似無咁紅腫，親人又出了院，初四照原定計劃去三天短線遊，看似沒事，黑仔事件又再來﹗

黑仔4)
剛好過了2月4日立春，正式踏入龍年，以為黑氣盡消，黑仔事件又再來，好番的腳指又再紅腫，今次真係發啦，拍攝馬拉松這天晨咁早出去影，企到十二點，對腳好痛好倦要回家休息，我都打算過了正月十五才去睇醫生，話晒新精頭去睇醫生不吉利，點之十五這天，坐巴士回家落車時，左腳拗柴跟住左手又撞到，當時手好痛，跟住手指麻痺，點呀吾係要我睇醫生呀？實在太痛啦要去睇醫生，醫生話無骨折(我當時個心定啲)只是撞到神經線，手才會有麻痺，又順便睇埋隻紅腫腳指，發炎要食消炎藥不可濕水才好，點解我咁黑仔，黑氣事件快離我而去